මින් පෙර අප දැක් වූ සිංහල භාෂාවේ අප විසින් වරද්දවන ලද තැන් ලිපිය මෙතනින් බලන්න.
දැන් සිංහල යනු මිශ්‍ර භාෂාව කි. බටහිරකරණය හා නවීකරණය ඔස්සේ සිංහල බස ද දැන් නවමු තාලයකට හැඩ ගැසී ඇත. අද ටෙක්නෝ ලංකා- අපේ සිංහල අපෙන් මත්තටහි අපි සිංහල බසට එක් වූ වෙනත් භාෂාවල වචන ගැන සාකච්ඡා කරන්නෙමු.
එස් යන ශබ්දවලින් ඇරඹි පද සිංහලයාගේ භාවිතයට පැමිනියේ ඉස් යන ශබ්දයෙනි. එ බැවින් එස්කෝලා යන පදය ඉස්කෝලේ ලෙස ද, එස්පාසෝ යන පදය ඉස්පාසුව ලෙස ද විය.
පරංගි එෆ් ශබ්දය සිංහලයට ප හඬින් එක්විය. පාං යන පදය ද පරංගි පදයකි. එසේ ම පරංගි බසින් සිංහලයට එක්වූ පෝරකේ, පෝරමේ, පෝරනුව, ගෑරුප්පුව හා අල්පෙනෙත්ත යන පද fora, forma, forno, garfo, alfinete යන පදවලින් බිඳී ආ පද යි.
සමහර වචනවල විවිධ ශබ්දවලට ඊට පර ව යෙදි ව්‍යංජනයක් යෙදිණි. අර්මසාංඕ, කුර්තෝ, ගර්පෝ, ෆෝර්කා, ලන්තෙර්නො, ෆෝර්නො වැනි පද ද අරුමෝසං, කුරුත්තු, ගෑරුප්පු, පෝරකේ, ලන්තැරුම, පෝරණුව යන පදවලින් සිංහලයට එක්විය.
ව්‍යංජනයකට පර ව ර් යෙදීමෙන් සෑදුණු පද ද මේ රීතියෙන් ම සිංහලයට හැඩ් ගැසිණි. මෝස්ත්‍ර, මෝස්තර විය. ලීස්ත්‍ර, ලීස්තර විය. ක්‍රාවො, කරාබු විය. කෲස්, කුරුසිය විය. ලාක්‍රෙ, ප්‍රථමයෙන් ම ලාකිරි බවට ද පසුව ලාකඩ බවට ද පෙරලිණි. ග්‍රාදේ, ගරාදි විය. වීද්‍රො, වීදුරු විය. විනාග්‍රෙ, විනාකිරි බවට ද පත් විය.
කලිසම යන්න සිංහලයට ආවේ කල්සාංඕ යන්නෙනි. පරංගි අල්ගෝස්, අලුගෝසු යනුවෙන් ද, අල්කොවිතෙයිරෝ, අලුකුත්තේරු යනුවෙන් ද සිංහලයට එක් විය. අලුගෝසුවා නිසා වධකයා වඳ විය. අලුකුත්තේරුවා යනු වෛශ්‍යාවන් වෙතට මිනිසුන් කැඳවා ගෙන යන්නා ය.
සමහරක් පද ඒවා ඇති ආකාරය අනුව විදෙස් පද යැයි නො සිතේ. නික්කාංසු යන්න පරංගි දිස්කාන්සු යන පදයෙන් ද, සිකුරුයි යන පදය පරංගි සිගුරො යන පදයෙන් ද ආ බව බොහෝ දෙනා නො දනිති. ගොරෝසු යන්න ග්‍රොස්සො යන පදයෙන් පැමිණියකි. විමසුමට කරුණ නම් පරංගි යන පදය ද සිංහලට එක්වූයේ ෆෙරිංගි යන හින්දි පදයෙන් බව යි.
මේ අයුරින් දවත් බොහෝ පද සොයා ගහ හැකි ය.
ඉදින් "ඉස්කෝලේ" පස් පාගා, සිංහල "මෝස්තරේ" උගෙන, "පෝරකේට" නො යා "නික්කාංසුවේ" දිවි ගමන තරණය කරන්නට අපි අදිටන් කර ගමු.
කමෙන්‍ටුවක් ලැබුනොත් හොඳා කියලා හිතෙනවා....
අදට එහෙමනම් යන්නම්..
ඔයත් සිංහල ගැන හොඳට දන්නවානම්, ඔයාගේ නම උඩින් සඳහන් කරලා සිංහලෙන් පෝස්‍ටුවක් ලියා පහත ඊ-මේල් ලිපිනයට එවන්න. ඔබගේ ලිපිය පරීක්ෂා කර ඇඩ්මින්වරුන් විසින් එය පල කෙරේ.
info.rusiru@gmail.com
සිංහල නිවැරදි ව භාවිතා කර සිංහල ගගනත සරසමු.
මූලාශ්‍ර- හඬ වටා පද රටා-ජේ. බී. දිසානායක
.jpg)
වැදගත් ලිපියක්. මම මෙවැනි එකක් සොයමින් හිටියේ.
ReplyDeleteබොහොමත් ම ස්තූතියි..
ReplyDelete